قصيدة شعبية بلهجة جزائرية --فكاهيه--

يوم لمتحان يكـــــرم المرء او يتهان

ســــجل يا زمــان حكــاية سي حــــمدان...في لقرايه دندان السنة الرابعة توجـهيا

طالع بالدزان في كـــــــل سنة تغـــــبان...نعدي في لمتحان الســــيقوند و لهــــليا

رايح لمتـــــحان و أمـي توصي بالإتـقان...مطـــولها بلسان في رود مبخسا بـــــيا

يا ولدي حــمدان الســــكر يفــــتح لذهان...ألحس قــــدر فنــجان ربي خلــــيك ليا

عندك صاحبك حسان يغرك كي شـطان...نعرفك يا ثعـبان تشــــتي غـــير لـــبليا

الصراحة ياخـــوان معمل على الجيران... يدزولي سطــران نوسـع فيـهم شـــــويا

دخلنا على الرنان في القسم نغـــلو ذبان... بلاصتي في لمكان على العـــيون مخفيا

لاعبها سي فهـــمان التنقال تقولي جــان... ملص ولكــمان البـــــيلات عمــلوها بيا

قبضتهم بالعضان تقولي واحــد جـيـعان... تهـدمو ذوك لســنان تنرفيت في العــقليا

لحتهم لوحان جُـو في ظهر سي النعـمان ... دارلي غضـبان بالتــهديد يقلــعلي سنـيا

خنست في لمكان و لعبـــتها ماني دريان... لحقني شوي سبان و تفــــــرات القضيا

الوقت راهو حان وحطونا ورق لمتحان... وقلبي يدق دقان الرجــفة قبضت رجليا

للأسئلة ماني فهمان نتمعن فيها تمــعان... فهــمت غير العــنوان مكتوب بالعـربيا

تفكرت الصحوان بابت عليه ســـــهران... حجيب مطــوي كتان مهـييه للضـروريا

خرجتو بالتمحان شافني ذاك الشـــيطان... يبــــرق كيف الجان يا خي زاقـات علـيا

يتمعن في الخـــزران حسبــني بن حيان... سماني كي الشيطان يا الشيخ بعد شويا

قبــض فيا الدخان و رفـعة تحت اللـسان... العقل راهو خـــان و لا كلـــمة تذكــيريا

قــلت لختي حـنان و صوتي بالألحــــان... عونيـني بلغــشان نكــتب جمـله فرنســيا

جاوبتني بالكشان كي دجاجة بو عــريان... لوجـه مزوق ألوان حاسبه روحه روميا

مكشوفه بلا حشمان طرشق في لــوبان ... شوف يا فـــلان الحــطه جامده شــــــويا

هولت الشبان و طار لعقل من لـــــذهان... كل واحد طمعان يكسب هــــوى حــيزيا

هذا الحال يا إخــوان مــــدة ساعــــتان... نعـرق بلا حــمان سال على الطــابـلـــيا

قالي سي شعبان واش عملت في لمتحان ... قتلو صـفر بضـمان راهي اتخــذت عـليا

لدار مروح جيعان وراسي يدور دوران... وبـركت كي لحــصان هاتو الماكـــلة ليا

حسبوني قبـطان لميما تزعرت بلي كان... اتسـمع في الجيران العــرس بالفنــطازيا

نشروالإعـــلان و ناجح اسمــــو بــــان... انا في خــبر كان مطـــرود مـن الدراسيا

بابا عليا غضبان و امي قلبها زعــــفان... ليله عقبت كي بركان الفلاقه في رجـــليا

خوذ يا سي حمدان الســوط جلد حصان... بايت في قشـطان عيني زرقـــــا دخلانيا

همت في لوديان نشـــكي بهم الزمــــان... خبــــطوني البيــبان حســــــيت بالمزريا

هذا حـال الكسلان عايش في الهـــــفان ...عطيها غير الحـطان سروال طاح شـويا

يوم لمتحان يكـــــرم المـــــرء او يهان... افهمتها بعد زمان يا حسرا تفـــرت فـيا

....

» لعبة كرة القدم الاكثر شعبية [Real football 2013] المقياس 240x320